Ni kwa jinsi gani Yesu ndiye Mchungaji Mwema?

Jibu la swali hili kuu linamaanisha tu: Yesu ni Mchungaji Mwema kwa sababu alisema Yeye ndiye. Katika injili ya Yohana, Yesu alisema, “Mimi ndimi mchungaji mwema” (Yohana 10:11). Tunaweza kuacha suala hilo hapo na kuridhika na dai la Yesu—dai la Yule ambaye angeweza kuwaambia washtaki wake, “Ni nani kati yenu anishuhudie kuwa na dhambi?” (Yohana 8:46). Yesu hakuongea tu ukweli, alisema, “Mimi ndimi ukweli” (Yohana 14:6). Hata hivyo, Yesu hakuwahi kutoa madai ya kumhusu Yeye Mwenyewe ambayo hayakuwa na ushahidi. Mtu yeyote anaweza kutoa madai kujihusu, hata madai makubwa. Lakini madai yanahitaji kupimwa ili kuonyesha kama ni ya kweli au ni udanganyifu tu.

Yesu aliposema, “Mimi ndimi mchungaji mwema,” maneno yake yaliyofuata yalifafanua alichomaanisha na kutoa msingi wa dai lake: “Mimi ndimi mchungaji mwema. Mchungaji mwema hutoa uhai wake kwa ajili ya kondoo” (Yohana 10:11).

Taswira ya kichungaji ya mchungaji na kondoo ilikuwa inajulikana sana kwa wasikilizaji wa Yesu. Waliishi katika nchi ambapo wachungaji na kondoo walikuwa kila mahali. Lakini zaidi ya hayo, walijua kutoka katika Maandiko kwamba Mungu alijifananisha na mchungaji anayejali sana kondoo wake—watu wake wanaoamini. Huenda Zaburi 23 inaonyesha kwa uwazi na kwa kumbukumbu jinsi Bwana Mungu anavyowatunza kondoo wake wa thamani.

Bwana
ndiye mchungaji wangu, sitapungukiwa na kitu.
Katika malisho ya majani mabichi hunilaza.
Kando ya maji ya utulivu huniongoza.
Hunihuisha nafsi yangu.
Huniongoza katika njia za haki
kwa ajili ya jina lake.

Nijapopita kati ya bonde la uvuli wa mauti,
sitaogopa mabaya,
kwa maana wewe upo pamoja nami;
Gongo lako na fimbo yako,
vyanifariji.

Waandaa meza mbele yangu
machoni pa watesi wangu;
Umenipaka mafuta kichwani pangu;
kikombe changu kinafurika.
Hakika wema na fadhili zitanifuata
siku zote za maisha yangu,
nami nitakaa katika nyumba ya Bwana
milele. (Zab. 23:1–6)

Nimeisoma zaburi hii mara mia kadhaa na kuikariri katika mazishi zaidi ya mia saba katika miaka yangu arobaini ya huduma. Maneno haya yanahifadhi kwa uzuri uangalizi, wema, utoaji, ulinzi, na upendo wa dhati wa Mchungaji wa mbinguni kwa kondoo wake wa thamani. Yanasisitiza kwa nini Bwana ndiye Mchungaji Mwema.

Yesu aliposema, “Mimi ndiye mchungaji mwema,” alikuwa akitoa dai la kushangaza. Alikuwa akidai kuwa Yeye ni Bwana aliyefanyika mwili ambaye anapenda, anajali, anatoa, na analinda kondoo wake. Lakini maneno ya Yesu yanaonyesha kwa njia ya ajabu jinsi ambavyo Yeye kweli ni Mchungaji Mwema: “Mchungaji mwema hutoa uhai wake kwa ajili ya kondoo wake.”

Hakuna mahali ambapo dai la Yesu kuwa Mchungaji Mwema lilionyeshwa kwa njia ya ajabu na ya kushangaza zaidi kuliko katika Yeye kutoa uhai wake ili kuhakikisha mema ya milele ya kondoo wake.

Martin Luther aliwahi kuandika, “Crux probat omnia,” au, “Msalaba ni kipimo cha kila kitu.” Akimaanisha kwamba kifo cha Yesu cha kubeba dhambi na kufidia dhambi msalabani pale Kalvari ni ufunuo kamili wa upendo wa Mungu kwa wenye dhambi. Dhambi zetu na kuanguka kwetu katika Adamu, kiongozi wetu wa kwanza, kulitutenganisha na Mungu na kutuleta chini ya hukumu yake ya haki na stahiki. Hatukuwa na uwezo wa kufanya chochote kurekebisha mambo kati yetu na Mungu. Lakini kile ambacho hatukuwa na uwezo wa kukifanya, Mungu alikifanya kwa kumtoa Mwanawe wake kuishi na kufa badala yetu, akibeba hukumu ambayo dhambi zetu zilistahili, akifufuka kwa ushindi siku ya tatu, na hivyo kutupatanisha na Mungu.

Kwa hiyo, ni kwa jinsi gani Yesu ni Mchungaji Mwema? Kwa upendo, Mchungaji huyu aliyetumwa kutoka mbinguni alijitoa mhanga ili kondoo waliopotea, wanaostahili hukumu, waweze kuokolewa kutokana na ghadhabu ya haki ya Mungu, kurejeshwa katika urafiki na ushirika wake, na siku moja wapate kuwa karibu naye.

Hili linanifanya niulize, Je, umeingia katika toba na imani kwa Mchungaji huyu Mwema, ukimshukuru Mungu Baba kwa kutomwacha Mwanawe mwenyewe, bali kumtoa kwa kifo cha msalaba kufa badala yako na kwa ajili yako? Yesu alisema:

Kondoo wangu huisikia sauti yangu, nami nawajua, nao hunifuata. Nami nawapa uzima wa milele, wala hawatapotea kamwe, wala hakuna mtu atakayewanyakua kutoka mkononi mwangu. Baba yangu, aliyenipa wao, ni mkuu kuliko wote, wala hakuna mtu awezaye kuwanyakua kutoka mkononi mwa Baba. Mimi na Baba tu wamoja. (Yohana 10:27–30)

Je, umesikia sauti Yake katika injili? Je, unamfuata Yesu, si tu kwa kumkiri kwa mdomo wako bali pia kwa kumtii katika maisha yako? Ikiwa ni hivyo, furahia kama mmoja wa kondoo Wake waliokombolewa kwa damu, ambao amewapa uzima wa milele.

Makala hii ni sehemu ya mkusanyiko wa Kauli za “Mimi Ndimi” za Yesu.