Utekelezaji wa Injili katika Nyakati Ngumu

Kauli “njia za neema” hurejelea zile njia ambazo Mungu huwapa watu Wake ili kuwatia nguvu katika safari yao ya kiroho hapa duniani. Kuna thamani kuu katika ukweli kwamba Mungu anaujua udhaifu wetu, naye katika rehema zake kuu anajishusha kwetu, akitupa tegemeo la kiroho kutusaidia katika safari yetu.

Kama baba alivyo na huruma kwa watoto wake,

ndivyo Bwana anavyowahurumia wale wanaomcha.

kwa kuwa anajua tulivyoumbwa;

anakumbuka kwamba sisi tu mavumbi. (Zaburi 103:13–14)

Makanisa ya mageuzo yameweka mkazo wa pekee juu ya njia tatu za neema: sala, Neno la Mungu, na sakramenti. Maombi ndiyo njia aliyoitoa Mungu ambayo kwayo tunawasilisha  mahitaji yetu na tegemeo kwa Mungu,kupitia imani katika Yesu Kristo, tukitarajia kwamba Atatupatia “kila mnachohitaji …kwa kadiri ya utajiri wake katika utukufu ndani ya Kristo Yesu” (Wafilipi 4:19). Maombi hujengwa juu ya msingi wa Neno, kote kote katika kusoma na kusikia Maandiko, na hasa katika kuhubiri kwa uaminifu, kwani Kristo anawasiliana nasi kupitia huduma ya wale waliotumwa kutangaza ujumbe wa wokovu (Warumi 10:14–17). Ndipo Neno linathibitishwa mioyoni mwetu kupitia sakramenti za ubatizo na Meza ya Bwana, ambazo huendelea kutumia ahadi za Neno mioyoni mwetu na kutuhakikishia, Roho anapofanya kazi ndani yetu kibinafsi na pia kwa pamoja katika kanisa, kwamba Mungu yu pamoja nasi. Kamwe sitakuacha,wala sitakupungukia kwa kuwa sisi ni watoto wake wasioweza kunyakuliwa kutoka katika mkono wake wa uweza (Waebrania 13:5–6; Yohana 10:28–29).

Jinsi Njia za Neema Zinavyotusaidia Kuwa na Tumaini Katika Kristo

Mungu hutupatia njia za neema kwa sababu tunazihitaji. Ibada ya agano la kale ilikuwa njia iliyoonekana wazi na ya kimwili zaidi ya kumkaribia Mungu—ikijumuisha kile ambacho Mtume Paulo anakiita “zenye udhaifu na upungufu” (Wagalatia 4:9). Mfumo wa hema ya kukutania uliwapatia watu wa Mungu mifano na vivuli vya duniani vilivyowawezesha kuona kidogo uhalisia wa mbinguni ambao ungetimizwa katika kufanyika mwili, maisha yasiyo na dhambi, kifo cha upatanisho, na ufufuo wa utukufu wa Yesu Kristo.

Katika agano jipya, sasa tunaye Kristo, kiini cha yote yaliyokuwa yameahidiwa kwa watu wa Mungu walipokuwa bado chini ya mlezi wa Sheria(Wagalatia 3:24–25). Sasa kwa kuwa Kristo amekuja na ameuanza utawala wake wa upatanishi kama Nabii, Kuhani, na Mfalme katika mkono wa kuume wa Mungu, hatuhitaji tena namna ya ibada iliyofungwa sana kwa uumbaji wa kale, ambayo inapita. Ibada yetu hutuinua kumwendea Kristo aliye mbinguni, ambaye hututayarisha katika uumbaji mpya tutakaoingia wakati Bwana wetu atakaporudi katika utukufu. (Wakolosai 3:1–4). Lakini tunapongoja siku hiyo kuu, tunafanya hivyo kama wale ambao bado hawajapata mambo hayo (Wafilipi 3:12–16). Tunabakia kuwa viumbe wenye kuugua katika ulimwengu ulio katika kuugua, hata tunapongoja kwa shauku utimilifu wa yale tuliyoahidiwa: ukombozi wa miili yetu(Warumi 8:18–23). Hata hivyo, tunapougulia maumivu na huzuni na kusubiri, tunayo ahadi kwamba Mungu atatupa Roho wake atusaidie katika udhaifu wetu (Warumi 8:26).

Sisi ni dhaifu kwa kuwa sisi ni wanadamu. Hata Yesu, Mwanadamu mkamilifu, alimtegemea Baba yake na alihitaji njia za neema. Yesu alimtegemea Roho katika matumizi yake yasiyo na dhambi ya njia hizo za neema, naye Mungu akamtia nguvu na kumuidhinisha Mwanawe katika kazi yake ya kutupatia ukombozi. Yesu sasa ni Kuhani wetu Mkuu mwenye huruma, ambaye tunaweza kumkaribia kwa ujasiri ili kupata msaada katika nyakati zetu za uhitaji (Waebrania 4:15–16). Alishiriki udhaifu wetu wa kimwili wa kibinadamu na kumtegemea Mungu, bila kuwa mshiriki wa udhaifu wa kimaadili wa dhambi. Mungu pia ameahidi Roho wake atusaidie katika udhaifu wetu .(Rum. 8:26). Ametupatia kila kitu tunachohitaji ili kuishi kwa ajili yake na utukufu wake katika ulimwengu huu.

Kwa hiyo, njia za neema ndizo njia za Mungu za kutupatia msaada tunaouhitaji kwa ajili ya kukimbia mbio ya imani. Hatuzihitaji tu kwa sababu sisi ni wanadamu, bali pia kwa sababu sisi ni wenye dhambi. Tunazihitaji kwa sababu tunaishi katika ulimwengu ambao bado unaugua chini ya athari za anguko la Adamu, na kwa sababu tunajaribiwa kumsahau Mungu na kumwacha Kristo. Mungu anatujua, na maarifa yake kutuhusu sisi ni maarifa ya upendo, maarifa ya Baba. Anatutambua kwa undani sana na anatupenda mno kiasi cha kutuwekea njia za kumkumbuka katika udhaifu wetu na kumrudia hata tunapoanguka mara kwa mara katika mashimo ya kina cha mateso na dhambi. Ikiwa wewe ni kama mimi, wajua maana ilivyo kuwa “mwepesi wa kutangatanga—mwepesi wa kumwacha Mungu ninayempenda.”

Katika nyakati za ugumu, majaribu, hasara, na huzuni, unamshikiliaje Mungu ambaye humwoni? Kwa kujihakikishia, kupitia maombi, kusoma na kusikia Neno, na kwa sakramenti, kwamba Mungu bado ni Mungu wako, kwamba Kristo bado anaendelea kukuombea mbinguni, na kwamba Roho Mtakatifu bado anatenda kazi moyoni mwako. Kwa hiyo, furahi, hata katika mateso yako, kwa maana kupitia hayo yote, Baba yako wa mbinguni anazalisha ndani yako tumaini lisiloweza kuaibishwa (Warumi 5:3–5).

Makala haya yalichapishwa awali kwenye Blogu ya Ligonier Ministries.